«Коми войтыр»: Уджсöдонъялiсны шогманаöн
« НазадКöрткерöсын культура шойччöм котыртан шöринын вöльгым 27 лунö мунiс «Коми войтыр» Дiнмукостса öтйöза öтмунöм районса представительстволöн ыджыд чукöртчылöм.
Таво чукöртчылöмлöн эз вöв торъя сюрöс. Тайö пöрйö вöчисны «Коми войтыр» районса представительстволöн нёль вося уджлы кывкöртöдъяс, бöрйисны районса представительство öвыль пырысьясöс (19 мортöс), «Коми войтыр» исполкомö пырысьöс да «Коми войтырлöн» 12- öд съезд вылö 13 делегатöс и Финн-йöгра войтырлöн конгресс вылö мунысьöс.
Чукöртчылöм вылын уджалiсны сикт-грездъясысь делегатъяс, республикаса министерствоясысь чина йöз, районса администрацияöн веськöдлысьясöс вежысьяс да веськöдланiнъясöн юрнуöдысьяс и специалистъяс, сикт овмöдчöминъясöн юралысьяс да мукöд йöз.
Удж мунiс урчитöм куим часысь дырджык. Сикт-грездъясысь делегатъяс кыпöдiсны сёрни асланыс овмöдчминъясын мытшöдъяс-гöрöдъяс йылысь, сеталiсны юалöмъяс чина войтырлы. Кыдзи и воддза воясö чукöртчылöмъяс дырйи коми йöз элясисны лёк туйяс, лöп-ёг шыбласъяс иналöм, бурдöдчанiнъяслöн удж, öтуввез (интернет) йитöд, культура керкаяс абутöм (Висерын, Керöсын, Аджеромын) вылö да сiдзи водзö.
Тöдчöдам, мый «Коми войтыр» районса öтмунöм котырлöн нёль вося удж йылысь кывкöртöдъяса отчёт, кодöс висьталiс Любовь Кирушева, котырöн веськöдлысь, шуисны (примитiсны гöлöсуйтöмöн) шогманаöн.
Конференциялöн удж помын резолюциö пыртiсны ветымынысь унджык вöзйöм, на серти и кутасны уджавны районса представительствоö выль пыртöм войтыр.
Сiдзжö юöртам, мый ыджыд чукöртчылöм дырйи Коми Республикаса войтырсикас политика министерствосянь, «Коми войтыр» районса представительствосянь, райадминистрациясянь Почёт грамотаясöн да аттьöалана гижöдъясöн пасйисны «Коми войтыр» öтмунöмын медводзмöстчысь, зiль войтырöс.
Оксана ГУДЫРЕВА.
Фото Игоря КАЗАКОВА
